Toshkent viloyatidagi gaz quyish shoxobchacida 623 mln so‘mlik gazdan noqonuniy foydalanilgan

Toshkent viloyati Yuqorichirchiq tumanidagi avtomobillarga gaz to‘ldirish kompressor shoxobchacida 623 mln so‘mlik tabiiy gazdan noqonuniy foydalanganlik holatlari aniqlandi, deya xabar qildi Energetika vazirligi matbuot xizmati. Ushbu shoxobcha Frozen Gas MCHJga tegishli ekani aytildi. Yoqilg‘i quyish shoxobchasida iste’mol qilingan tabiiy gazning haqiqiy ko‘rsatkichlarini kamaytirish maqsadida elektron gaz hisoblash uskunasi tarkibiy qismlariga ta’sir o‘tkazilgani aniqlandi. Tekshiruv shuni ko‘rsatdiki, korxona tomonidan 623 ming kub metr gazdan noqonuniy foydalanilgan, bu 35 ming xonadonning bir kunlik iste’moli uchun yetarli bo‘lishi ma’lum qilindi. Holat yuzasidan, qonun doirasida chora ko‘rilishini ta’minlash maqsadida tegishli hujjatlar huquqni muhofaza qilish organlariga yuborish uchun jamlanmoqda, deyiladi xabarda. Eslatib o‘tamiz, avvlroq O‘ztransgaz" respublikada kuzatilgan sovuq ob-havo tufayli avtomobillarga gaz to‘ldirish kompressor shoxobchalarida cheklovlar joriy etilishini ma’lum qilgandi. Jumladan, Farg‘ona vodiysidagi AGTKSHlar faoliyati 18 fevral kuni 14:00 dan 19 fevral 06:00 gacha vaqtincha to‘xtatildi.